ಕೋಲಾರ: ದೇಶದ ಮೊದಲ ಖಾಸಗಿ ಹೆಲಿಕಾಪ್ಟರ್‌ ಉತ್ಪಾದನೆ ಘಟಕವನ್ನು ಕೋಲಾರದ ವೇಮಗಲ್‌ ಕೈಗಾರಿಕಾ ಪ್ರದೇಶದಲ್ಲಿ ಸ್ಥಾಪಿಸಲು ಟಾಟಾ ಅಡ್ವಾನ್ಸ್‌ ಸಿಸ್ಟಮ್ಸ್‌ ಲಿಮಿಟೆಡ್‌ (ಟಿಎಎಸ್‌ಎಲ್‌) ಹಾಗೂ ಏರ್‌ಬಸ್‌ ಸಂಸ್ಥೆಗಳು ಮುಂದಾಗಿದ್ದು, ಸಾವಿರಾರು ಜನರಿಗೆ ಉದ್ಯೋಗ ಸೃಷ್ಟಿಯ ನಿರೀಕ್ಷೆ ಮೂಡಿಸಿದೆ. ಕೇಂದ್ರ ಸರಕಾರದ ಮೇಡ್‌ ಇನ್‌ ಇಂಡಿಯಾ ಯೋಜನೆಯಡಿ ಎಚ್‌-125 ಹೆಲಿಕಾಪ್ಟರ್‌ನ ಅಂತಿಮ ಜೋಡಣಾ ಘಟಕ (ಫೈನಲ್‌ ಅಸೆಂಬ್ಲಿಲೈನ್‌) ಸ್ಥಾಪಿಸಲಾಗುತ್ತಿದ್ದು, ಫ್ರಾನ್ಸ್‌, ಅಮೆರಿಕ ಮತ್ತು ಬ್ರೆಜಿಲ್‌ ಬಳಿಕ ಭಾರತದಲ್ಲಿ ಎಚ್‌-125 ಹೆಲಿಕಾಪ್ಟರ್‌ ಉತ್ಪಾದನಾ ಘಟಕ ಸ್ಥಾಪನೆಯಾಗುತ್ತಿದೆ.
j3tvkannada
ಆಂಧ್ರಪ್ರದೇಶದ ಮುಖ್ಯಮಂತ್ರಿ ಈ ಘಟಕವನ್ನು ತಾವು ಸೆಳೆಯಲು ತೀವ್ರ ಪ್ರಯತ್ನ ನಡೆಸಿತ್ತಾದರೂ, ಅಂತಿಮವಾಗಿ ಕೋಲಾರದ ವೇಮಗಲ್‌ ಅನ್ನೇ ಎ.ಎಸ್.ಎಲ್‌ ಮತ್ತು ಏರ್‌ಬಸ್‌ ಸಂಸ್ಥೆಗಳು ಆಯ್ಕೆ ಮಾಡಿರುವುದು ರಾಜ್ಯದ ಯುವಕರ ಪಾಲಿಗೆ ಆಶಾದಾಯಕವಾಗಿದೆ. ಎಂತದ್ದೇ ಪ್ರತಿಕೂಲ ಪರಿಸ್ಥಿತಿಗಳಲ್ಲಿಯೂ ಹಾರಾಟ ಮಾಡುವ ಕಾರ್ಯಕ್ಷಮತೆ ಹೊಂದಿರುವ ಎಚ್‌-125 ಹೆಲಿಕಾಪ್ಟರ್‌ ಮೌಂಟ್‌ ಎವರೆಸ್ಟ್‌ನಲ್ಲಿ ಲ್ಯಾಂಡ್‌ ಆದ ಹೆಗ್ಗಳಿಕೆಯನ್ನು ಹೊಂದಿದೆ.
ಈಗಾಗಲೇ ವೇಮಗಲ್‌ ಕೈಗಾರಿಕಾ ಪ್ರದೇಶದಲ್ಲಿ ಟಾಟಾ ಸಂಸ್ಥೆ ಉಪಗ್ರಹ ತಯಾರಿಕಾ ಘಟಕವನ್ನು ಹೊಂದಿರುವುದರಿಂದ ಯೋಜನೆಗೆ ಅನುಕೂಲವಾಗಲಿದೆ. ಟಾಟಾ ಹಾಗೂ ಏರ್‌ಬಸ್‌ ಸಂಸ್ಥೆಗಳ ಇತರ ಘಟಕಗಳು ಹಾಗೂ ಖಾಸಗಿ ಸಂಸ್ಥೆಗಳಲ್ಲಿ ತಯಾರಾದ ಬಿಡಿ ಭಾಗಗಳನ್ನು ಈ ಘಟಕಕ್ಕೆ ತರಿಸಿಕೊಂಡು ಹೆಲಿಕಾಪ್ಟರ್‌ಗೆ ಅಂತಿಮ ರೂಪ ನೀಡಲಾಗುತ್ತದೆ. ಆರಂಭದಲ್ಲಿ ವಾರ್ಷಿಕ 10 ಹೆಲಿಕಾಪ್ಟರ್‌ಗಳ ಜೋಡಣೆಯಾಗಲಿದ್ದು, ವರ್ಷದಿಂದ ವರ್ಷಕ್ಕೆ ಉತ್ಪಾದನೆ ಹೆಚ್ಚಾಗಲಿದೆ. ಮುಂದಿನ 20 ವರ್ಷಗಳಲ್ಲಿ 500 ಹೆಲಿಕಾಪ್ಟರ್‌ಗಳ ಜೋಡಣೆ ಮಾಡುವ ನಿರೀಕ್ಷೆಯಿದೆ.
ಆಧುನಿಕ ವೈಮಾನಿಕ ತಯಾರಿಕಾ ವಲಯದಲ್ಲಿ ರಾಜ್ಯ ಮುಂಚೂಣಿಯಲ್ಲಿದೆ. ಈಗ ಏರ್‌ಬಸ್‌ನ ಎಚ್‌-125 ಹೆಲಿಕಾಪ್ಟರ್‌ ಘಟಕ ರಾಜ್ಯದಲ್ಲಿ ಸ್ಥಾಪನೆಯಾಗಲಿದ್ದು, ಸರಕಾರದ ಕೈಗಾರಿಕಾ ಸ್ನೇಹಿ ನೀತಿಗಳಿಂದ ಮತ್ತಷ್ಟು ಕಂಪೆನಿಗಳು ರಾಜ್ಯಕ್ಕೆ ಬರುವ ಭರವಸೆ ಇದೆ ಎಂದಿದ್ದಾರೆ ಕೈಗಾರಿಕಾ ಸಚಿವ ಎಂ.ಬಿ.ಪಾಟೀಲ್‌
- 2026ರಲ್ಲಿ ಘಟಕ ಕಾರ್ಯಾರಂಭ
- ವಾರ್ಷಿಕ 10 ಹೆಲಿಕಾಪ್ಟರ್‌ಗಳ ಉತ್ಪಾದನೆ.
- ವೇಮಗಲ್‌ನಲ್ಲಿ7.40 ಲಕ್ಷ ಚದರಡಿ ಜಾಗ ಮಂಜೂರು.
- ಪ್ರತ್ಯಕ್ಷ, ಪರೋಕ್ಷವಾಗಿ ಸಾವಿರಾರು ಉದ್ಯೋಗ ಸೃಷ್ಟಿ.
ಎಚ್‌-125 ಹೆಲಿಕಾಪ್ಟರ್‌ ವಿಶೇಷತೆ
- ಸಿಂಗಲ್‌ ಎಂಜಿನ್‌, ದಕ್ಷ ಕಾರ್ಯನಿರ್ವಹಣೆಗೆ ಜನಪ್ರಿಯ.
- ಆರು ಸೀಟರ್‌ ಸಾಮರ್ಥ್ಯ, ಎಂತಹದ್ದೇ ವಾತಾವರಣದಲ್ಲಿಯೂ ಹಾರಾಟ.
- ನಾಗರಿಕ, ರಕ್ಷಣಾ ಹಾಗೂ ಆರೋಗ್ಯ ಸೇರಿ ಎಲ್ಲಸೇವೆಗಳಿಗೆ ಸೂಕ್ತ.
- ಜಗತ್ತಿನಾದ್ಯಂತ ಸದ್ಯ 4,300 ಹೆಲಿಕಾಪ್ಟರ್‌ಗಳು ಕಾರ್ಯಾಚರಣೆ.
