ಬೆಳಗಾವಿ: ಜಿಲ್ಲಾ ಸಹಕಾರ ಹಾಲು ಉತ್ಪಾದಕರ ಸಂಘಗಳ ಒಕ್ಕೂಟ (ಬೆಮುಲ್‌) 2024- 25ನೇ ಸಾಲಿನಲ್ಲಿ13.26 ಕೋಟಿ ರೂ. ಲಾಭ ಗಳಿಸಿದೆ ಎಂದು ಒಕ್ಕೂಟದ ಅಧ್ಯಕ್ಷ, ಶಾಸಕ ಬಾಲಚಂದ್ರ ಜಾರಕಿಹೊಳಿ ತಿಳಿಸಿದರು. ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ”ಒಕ್ಕೂಟದ ಒಟ್ಟು ವಹಿವಾಟು 399.50 ಕೋಟಿ ರೂ. ಕಳೆದ ಸಾಲಿನ 320.83 ಕೋಟಿ ರೂ. ವಹಿವಾಟಿಗೆ ಹೋಲಿಸಿದರೆ ಶೇ. 24ರಷ್ಟು ಪ್ರಗತಿಯಾಗಿದೆ. ಒಕ್ಕೂಟದ ಖರ್ಚು ವೆಚ್ಚಗಳಲ್ಲಿ ವಾರ್ಷಿಕ 2.52 ಕೋಟಿ ರೂ. ಉಳಿತಾಯ ಮಾಡಲಾಗಿದೆ,” ಎಂದು ತಿಳಿಸಿದರು.
2024-25ನೇ ಆರ್ಥಿಕ ವರ್ಷದಲ್ಲಿ43 ಹೊಸ ಸಂಘಗಳನ್ನು ಸ್ಥಾಪಿಸಲಾಗಿದೆ. ಜಿಲ್ಲೆಯ ಒಟ್ಟು 610 ಸಂಘಗಳಿಂದ ಪ್ರತಿದಿನ ಸರಾಸರಿ 2.10 ಲಕ್ಷ ಲೀ. ಹಾಲು ಶೇಖರಿಸಲಾಗಿದೆ. ಹಿಂದಿನ ವರ್ಷಕ್ಕೆ ಹೋಲಿಸಿದಲ್ಲಿ ಶೇ. 22ರಷ್ಟು ಪ್ರಗತಿಯಿದೆ. ಈ ಸಾಲಿನಲ್ಲಿ12,797 ರಾಸುಗಳಿಗೆ ಒಕ್ಕೂಟದಿಂದ ಶೇ. 75ರಷ್ಟು ರಿಯಾಯಿತಿ ದರದಲ್ಲಿ ವಿಮಾ ಸೌಲಭ್ಯ, ಮೃತಪಟ್ಟ 245 ರಾಸುಗಳ ಮಾಲೀಕರಿಗೆ 1.22 ಲಕ್ಷ ರೂ. ವಿಮೆ ಪರಿಹಾರ ನೀಡಲಾಗಿದೆ. 1,34,138 ಸದಸ್ಯರ ರಾಸುಗಳಿಗೆ ಕೃತಕ ಗರ್ಭಧಾರಣೆ ಸೇವೆ ಒದಗಿಸಲಾಗಿದೆ. 20 ಮಹಿಳಾ ಸಂಘಗಳಿಗೆ ರಾಸು ಖರೀದಿಗೆ 1.50 ಕೋಟಿ ರೂ. ಅನುದಾನ ನೀಡಲಾಗಿದೆ,” ಎಂದು ತಿಳಿಸಿದರು.
ಗೋವಾಕ್ಕೆ ಮೊಸರು ಪೂರೈಕೆ
ಫ್ಲೆಕ್ಸಿ ಘಟಕದಿಂದ 80 ಲಕ್ಷ ಲೀಟರ್‌ ಹಾಲನ್ನು ಸ್ಥಳೀಯವಾಗಿ ಮತ್ತು ಆಂಧ್ರಪ್ರದೇಶಕ್ಕೆ ಮಾರಾಟ ಮಾಡಲಾಗಿದೆ. ಹೊಸದಾಗಿ 10 ಕೆಜಿ ಬಕೆಟ್‌ ಮೊಸರು ಮಾರಾಟ ಪ್ರಾರಂಭಿಸಲಾಗಿದ್ದು, ಬೆಳಗಾವಿ ಜಿಲ್ಲೆ ಮತ್ತು ಗೋವಾ ಮಾರುಕಟ್ಟೆಯಲ್ಲಿ ಪ್ರತಿದಿನ 50ರಿಂದ 100 ಬಕೆಟ್‌ ಮೊಸರು ಮಾರಾಟವಾಗುತ್ತಿದೆ,” ಎಂದು ಅವರು ತಿಳಿಸಿದರು.
ಮುಂಬೈಗೆ ಎಮ್ಮೆ ಹಾಲು ಪೂರೈಕೆ
ನವೆಂಬರ್‌-2024ರಿಂದ ಬೆಳಗಾವಿ ಹಾಲು ಒಕ್ಕೂಟದಿಂದ ಮುಂಬೈ ಮಾರುಕಟ್ಟೆಗೆ ಎಮ್ಮೆ ಹಾಲು ಪೂರೈಸಲಾಗುತ್ತಿದ್ದು, ಪ್ರತಿದಿನ 5 ಸಾವಿರ ಲೀ. ಹಾಲು ಮಾರಾಟವಾಗುತ್ತಿದೆ. ಅಲ್ಲದೇ 2025ರ ಫೆಬ್ರವರಿಯಲ್ಲಿ130 ಎಂ.ಎಲ್‌ ಪ್ಯಾಕ್‌ನಲ್ಲಿ2,50,000 ಮಜ್ಜಿಗೆ ಪ್ಯಾಕೇಟ್‌ಗಳನ್ನು ಯಲ್ಲಮ್ಮನ ಗುಡ್ಡಕ್ಕೆ ಸರಬರಾಜು ಮಾಡಲಾಗಿದೆ, ಎಂದು ಬಾಲಚಂದ್ರ ಜಾರಕಿಹೊಳಿ ಮಾಹಿತಿ ನೀಡಿದರು.
2024- 25ನೇ ಸಾಲಿನ ವಹಿವಾಟುಗಳು
- 3,80,516 ಲೀ. ತುಪ್ಪ
- 41,12,820 ಲೀ. ಮೊಸರು
- 1,73,746 ಕೆಜಿ ಪನ್ನೀರ್‌
- 74,245 ಕೆಜಿ ಕುಂದಾ
- 12,460 ಟನ್‌ ಪಶು ಆಹಾರ ಪೂರೈಕೆಯಾಗಿದೆ.
ಮೆಗಾ ಡೇರಿ ಸ್ಥಾಪನೆಗೆ ಚಿಂತನೆ
ಬೆಳಗಾವಿ ಜಿಲ್ಲೆಯಲ್ಲಿಅಂದಾಜು 350 ಕೋಟಿ ರೂ. ವೆಚ್ಚದಲ್ಲಿ ಹೈಟೆಕ್‌ ಮೆಗಾ ಡೇರಿ ನಿರ್ಮಿಸಲು ಚಿಂತನೆ ನಡೆದಿದೆ. ಸೂಕ್ತ ಜಾಗ ಹುಡುಕಲಾಗುತ್ತಿದೆ. ಮುಂದಿನ ದಿನಗಳಲ್ಲಿ150 ಕೋಟಿ ರೂ. ವೆಚ್ಚದಲ್ಲಿ ಬ್ಯಾಕ್ಟೋಪ್ಯೂಜ್‌ ಯಂತ್ರ ಅಳವಡಿಕೆ ಕಾರ್ಯ ಮತ್ತು 25 ಲಕ್ಷ ರೂ. ವೆಚ್ಚದ 500 ಕೆಜಿ ಸಾಮರ್ಥ್ಯದ ಸಿ.ಬಿ.ಎಂ.ಎಂ ಯಂತ್ರ ಅಳವಡಿಸಲಾಗುತ್ತಿದೆ,” ಎಂದು ಬಾಲಚಂದ್ರ ಜಾರಕಿಹೊಳಿ ತಿಳಿಸಿದ್ದಾರೆ.
