ಬೆಳಗಾವಿ: ರಾಜ್ಯದ ಗಡಿ ಜಿಲ್ಲೆಯಾದ ಬೆಳಗಾವಿಯಲ್ಲಿ ಕಳೆದ 14 ದಿನಗಳಿಂದ ಮುಂಗಾರು ಪೂರ್ವ ಮಳೆಯು ರೈತರ ಮೊಗದಲ್ಲಿ ಮಂದಹಾಸ ಮೂಡಿಸಿದೆ. ಜೂನ್‌ ಮೊದಲ ವಾರದಲ್ಲಿ ಮುಂಗಾರು ಬಿತ್ತನೆಗೆ ತಯಾರಿ ಆರಂಭವಾಗಿರುವಂತೆ, ರೈತರು ಬೀಜಗಳ ಆಯ್ಕೆ ಮತ್ತು ಖರೀದಿಯಲ್ಲಿ ತೊಡಗಿದ್ದಾರೆ. ರಾಯಬಾಗ, ಚಿಕ್ಕೋಡಿ, ಹುಕ್ಕೇರಿ, ಗೋಕಾಕ್, ನಿಪ್ಪಾಣಿ ಮತ್ತು ಅಥಣಿ ತಾಲೂಕುಗಳಲ್ಲಿ ವಾಣಿಜ್ಯ ಬೆಳೆಯಾದ ಅರಿಶಿನಕ್ಕೆ ಹೆಚ್ಚಿನ ಒಲವು ತೋರುತ್ತಿದ್ದಾರೆ. ಕಡಪಾ ಮತ್ತು ಶೈಲಂ ತಳಿಯ ಬೀಜಗಳು ಮಾರುಕಟ್ಟೆಯಲ್ಲಿ ಮುಂಚೂಣಿಯಲ್ಲಿವೆ.
j3tvkannada
ರಾಜ್ಯದಲ್ಲಿ ಅರಿಶಿನ ಬೀಜಗಳನ್ನು ಹೆಚ್ಚಾಗಿ ನೆರೆಯ ಆಂಧ್ರಪ್ರದೇಶದಿಂದ ಆಮದು ಮಾಡಿಕೊಳ್ಳಲಾಗುತ್ತಿದೆ. ಸ್ಥಳೀಯವಾಗಿ ಬೆಳೆದ ಬೀಜಗಳಿಂದ ಉತ್ತಮ ಇಳುವರಿ ಸಿಗದಿರುವ ಕಾರಣ, ರೈತರು ಹೊರ ರಾಜ್ಯದ ಬೀಜಗಳಿಗೆ ಆದ್ಯತೆ ನೀಡುತ್ತಿದ್ದಾರೆ. ಈಗಾಗಲೇ ಅಥಣಿ ಮಾರುಕಟ್ಟೆಯಲ್ಲಿ ಪ್ರತಿದಿನ 30 ರಿಂದ 40 ಟನ್‌ ಬೀಜಗಳು ಮಾರಾಟವಾಗುತ್ತಿವೆ. ಆದರೆ ಬೀಜಗಳ ಬೆಲೆ ರೈತರ ಜೇಬಿಗೆ ಕತ್ತರಿ ಹಾಕುತ್ತಿದೆ. ಕಡಪಾ ತಳಿಯ ಬೀಜ ಕ್ವಿಂಟಲ್‌ಗೆ 4,000-5,000 ರೂ.ಗೆ ಮಾರಾಟವಾಗುತ್ತಿದ್ದರೆ, ಶೈಲಂ ತಳಿಯ ಬೀಜ 6,000-7,000 ರೂ.ಗೆ ಲಭ್ಯವಿದೆ.
ಕಳೆದ ವರ್ಷ ಅರಿಶಿನಕ್ಕೆ ಉತ್ತಮ ಬೆಲೆ ಸಿಕ್ಕಿತ್ತು. ಈ ವರ್ಷವೂ ಉತ್ತಮ ಮಳೆಯಿಂದಾಗಿ ರೈತರು ಅರಿಶಿನ ಬೆಳೆಯ ಕಡೆಗೆ ಹೆಚ್ಚಿನ ಆಸಕ್ತಿ ತೋರುತ್ತಿದ್ದಾರೆ. ಅನುಕೂಲಕರ ಮಳೆಯಿಂದಾಗಿ ಬೀಜಗಳ ಖರೀದಿಯ ಜೊತೆಗೆ ಕೃಷಿ ಕಾರ್ಯಗಳು ಭರದಿಂದ ಸಾಗಿವೆ. ವ್ಯಾಪಾರಿ ಲಕ್ಷ್ಮಣ ನಂದಿವಾಲೆ ಮಳೆಯಿಂದ ರೈತರಲ್ಲಿ ಉತ್ಸಾಹ ಹೆಚ್ಚಿದೆ. ಅರಿಶಿನ ಬೀಜಗಳ ಬೇಡಿಕೆ ಈಗ ಗರಿಷ್ಠವಾಗಿದೆ ಎಂದು ತಿಳಿಸಿದ್ದಾರೆ. ಈ ಮುಂಗಾರು ರೈತರಿಗೆ ಶುಭದಾಯಕವಾಗಿರಲಿ ಎಂದು ಎಲ್ಲರೂ ಆಶಿಸುತ್ತಿದ್ದಾರೆ.
