ಶಿವಮೊಗ್ಗ: ಶಿವಮೊಗ್ಗ ವಿಮಾನ ನಿಲ್ದಾಣವನ್ನು ಬಳಸಿಕೊಂಡು ಮತ್ತಷ್ಟು ಹೊಸ ಉದ್ಯಮಗಳನ್ನು ಸ್ಥಾಪಿಸಲು ಉದ್ದೇಶಿಸಿರುವ ರಾಜ್ಯ ಸರಕಾರವು ಆರಂಭಿಕವಾಗಿ ವೈಮಾನಿಕ ತರಬೇತಿ ಸಂಸ್ಥೆ (ಫ್ಲೈಟ್‌ ಟ್ರೈನಿಂಗ್‌ ಆರ್ಗನೈಜೇಷನ್‌ – ಎಫ್‌ಟಿಒ) ಆರಂಭಿಸಲು ನಿರ್ಧರಿಸಿದೆ. ರಾಜ್ಯ ಸರಕಾರದ ಒಡೆತನದ ಶಿವಮೊಗ್ಗ ವಿಮಾನ ನಿಲ್ದಾಣವನ್ನು ರಾಜ್ಯ ಕೈಗಾರಿಕಾ ಮತ್ತು ಮೂಲಸೌಲಭ್ಯ ಅಭಿವೃದ್ಧಿ ನಿಗಮ (ಕೆಎಸ್‌ಐಐಡಿಸಿ) ನಿರ್ವಹಣೆ ಮಾಡುತ್ತಿದೆ. ಪೈಲೆಟ್‌ ತರಬೇತಿ ಶಾಲೆಯನ್ನು ಆರಂಭಿಸಿ ವಾರ್ಷಿಕ 100 ಪೈಲೆಟ್‌ಗಳನ್ನು ರೂಪಿಸುವ ಗುರಿ ಹಾಕಿಕೊಳ್ಳಲಾಗಿದ್ದು ಅದಕ್ಕಾಗಿ ಜಾಗತಿಕ ಮಟ್ಟದ ಖಾಸಗಿ ಸಂಸ್ಥೆಗಳಿಂದ ಟೆಂಡರ್‌ ಕರೆಯಲಾಗಿದೆ.
j3tvkannada
ನಿರ್ಮಾಣ ನಿರ್ವಹಣೆ ಮತ್ತು ಹಸ್ತಾಂತರ (ಬಿಒಟಿ)ದ ಆಧಾರದ ಮೇಲೆ ಟೆಂಡರ್‌ ಪಡೆದುಕೊಳ್ಳುವ ಸಂಸ್ಥೆಯು ಎಫ್‌.ಟಿ.ಒ ನಿರ್ಮಿಸಿ 20 ವರ್ಷಗಳ ಕಾಲ ನಿರ್ವಹಣೆ ಮಾಡಿ ಬಳಿಕ ಸರಕಾರಕ್ಕೆ ಹಸ್ತಾಂತರಿಸಬೇಕು. ವೈಮಾನಿಕ ತರಬೇತಿ ಸಂಸ್ಥೆಯನ್ನು ವಿಮಾನ ನಿಲ್ದಾಣದ ಆವರಣದಲ್ಲೆ ನಿರ್ಮಿಸಲು ಅವಕಾಶ ನೀಡಲಾಗುತ್ತದೆ. ಅದಕ್ಕಾಗಿ 3,500 ಚದರ ಮೀಟರ್‌ ಜಾಗ ನೀಡಲಾಗುತ್ತದೆ. ಅದರಲ್ಲಿ 1500 ಚದರ ಮೀಟರ್‌ ಜಾಗವನ್ನು ಟರ್ಮಿನಲ್‌ ಪಕ್ಕದಲ್ಲಿರುವ ಹ್ಯಾಂಗರ್‌ ಸಮೀಪದಲ್ಲಿ ಒದಗಿಸಿದರೆ ಇನ್ನುಳಿದ 2000 ಚದರ ಮೀಟರ್‌ ಜಾಗವನ್ನು ಟರ್ಮಿನಲ್‌ನ ಹೊರ ಭಾಗದಲ್ಲಿ ನೀಡಲಾಗುತ್ತದೆ. ಇದರಲ್ಲಿ ಕಚೇರಿ ತರಗತಿ ಕೊಠಡಿ, ಗ್ರಂಥಾಲಯ, ರೇಡಿಯೊ ಟೆಲಿಫೋನಿ ತರಬೇತಿ ಸೇರಿದಂತೆ ತರಬೇತಿ ಸಂಸ್ಥೆಗೆ ಬೇಕಾದ ಎಲ್ಲ ರೀತಿಯ ಅತ್ಯಾಧುನಿಕ ಸೌಲಭ್ಯಗಳನ್ನು ನಿರ್ಮಿಸಬೇಕು.
j3tvkannada
ಕೆ.ಎಸ್‌.ಐ.ಐ.ಡಿ.ಸಿ ಸಂಸ್ಥೆಯು ಫೈರ್‌ ಸೇಫ್ಟಿ, ಆಂಬ್ಯುಲೆನ್ಸ್‌ ಸೌಲಭ್ಯ, ಏರ್‌ ಟ್ರಾಫಿಕ್‌ ಕಂಟ್ರೋಲ್‌, ರನ್‌ ವೇ ನಿರ್ವಹಣೆ ಮಾಡಲಿದೆ. ತರಬೇತಿ ಸಂಸ್ಥೆ ಆರಂಭಿಸುವ ಏಜೆನ್ಸಿಯು ತನ್ನ ವ್ಯಾಪ್ತಿಯ ವಿದ್ಯುತ್‌ ಬಿಲ್‌ ಸೆಕ್ಯೂರಿಟಿ ಸೇರಿದಂತೆ ವಿವಿಧ ನಿರ್ವಹಣೆಗಳನ್ನು ತಾನೇ ಮಾಡಿಕೊಳ್ಳಬೇಕು. ಅಲ್ಲದೆ ವಿಮಾನಯಾನ ನಿರ್ದೇಶನಾಲಯ (ಡಿಜಿಸಿಎ) ನಾಗರಿಕ ವಿಮಾನಯಾನ ಇಲಾಖೆ ಸೂಚಿಸಿರುವ ನಿಯಮಗಳ ಪ್ರಕಾರ ಕಾರ್ಯನಿರ್ವಹಿಸಬೇಕು ಎಂದು ಸೂಚಿಸಲಾಗಿದೆ. ತರಬೇತಿ ಸಂಸ್ಥೆಯಲ್ಲಿ ಕನ್ನಡಿಗರು ಮತ್ತು ಮಹಿಳೆಯರಿಗೆ ಪ್ರಾತಿನಿಧ್ಯ ನೀಡಲಾಗುತ್ತದೆ.
ತರಬೇತಿಗೆ ಆಯ್ಕೆ ಮಾಡುವಾಗ ಶೇ. 25ರಷ್ಟು ಸೀಟುಗಳನ್ನು ಕನ್ನಡಿಗರು ಮತ್ತು ಮಹಿಳೆಯರಿಗೆ ಮೀಸಲಿಡಬೇಕು. ಅವರಿಗೆ ಶುಲ್ಕ ವಿನಾಯಿತಿ ಸಹ ನೀಡಬೇಕು. ಏಜೆನ್ಸಿಯೆ ಅಭ್ಯರ್ಥಿಗಳನ್ನು ಆಯ್ಕೆ ಮಾಡಿದರೂ ಅದಕ್ಕೆ ಮುನ್ನ ಕೆಎಸ್‌ಐಐಡಿಸಿ ಅನುಮತಿ ಪಡೆಯಬೇಕು. ಪ್ರತಿ ವರ್ಷ 100 ಮಂದಿಗೆ ತರಬೇತಿ ನೀಡುವ ಗುರಿ ಇದ್ದು ಮೊದಲ ಎರಡು ವರ್ಷ ತಲಾ 50 ಅಭ್ಯರ್ಥಿಗಳನ್ನು ಪ್ರವೇಶ ಮಾಡಿಕೊಂಡು ಬಳಿಕ 3ನೇ ವರ್ಷದಿಂದ 100 ಅಭ್ಯರ್ಥಿಗಳಿಗೆ ಪ್ರವೇಶ ಮಾಡಿಕೊಳ್ಳಬಹುದು. ಡಿ.ಜಿ.ಸಿ.ಎ ನಿಯಮದಂತೆ ತರಬೇತಿ ಸಂಸ್ಥೆ ಕಾರ್ಯಾರಂಭ ಮಾಡಿದ ಮೂರು ತಿಂಗಳ ಒಳಗೆ ಮೂರು ವಿಮಾನಗಳು, ವರ್ಷದ ಬಳಿಕ ಮತ್ತಷ್ಟು ವಿಮಾನಗಳು ಸಂಸ್ಥೆಯಲ್ಲಿರಬೇಕು ಎಂಬ ಷರತ್ತುಗಳನ್ನು ಹಾಕಲಾಗಿದೆ.
