ಹೊಸಪೇಟೆ: ನಗರದ ಸಂಡೂರು ರಸ್ತೆಯಲ್ಲಿರುವ ಉಪವಿಭಾಗಾಧಿಕಾರಿಗಳ (Sub-Divisional Officers) ಕಚೇರಿಯ ಕಾಂಪೌಂಡ್‌ಗೆ ಖಾಸಗಿ ವ್ಯಕ್ತಿಗಳು ಟು-ಲೆಟ್‌ ಬೋರ್ಡ್‌ ಅಂಟಿಸಿದ್ದು, ಇದು ಎಸಿ ಕಚೇರಿಯೇ ಬಾಡಿಗೆಗೆ ಇದೆಯಾ ಎನ್ನುವಂತಿದೆ. ಖಾಲಿ ಇರುವ ಮನೆಗಳಿಗೆ ಅಂಟಿಸುವ ಟು-ಲೆಟ್‌ ಬೋರ್ಡ್‌ ಸರಕಾರಿ ಕಚೇರಿಗೆ ಅಂಟಿಸಿದ್ದಾರಲ್ಲ ಎಂದು ಕಚೇರಿಗೆ ಬರುವ ಜನರು ಮಾತಾಡಿಕೊಳ್ಳುತ್ತಿದ್ದಾರೆ. ಸಹಾಯಕ ಆಯುಕ್ತರ ಕಚೇರಿ ಬಾಡಿಗೆಗೆ ಇದೆ ಎಂಬಂತಿದೆ ಈ ಬೋರ್ಡ್‌. ಆದರೆ, ಇದು ಎರಡರಿಂದ ಮೂರು ವಾರಗಳಿಂದ ಇದ್ದರೂ ಅಧಿಕಾರಿಗಳ ಗಮನಕ್ಕೆ ಬಂದಿಲ್ಲವಾ? ಎಂದು ಪ್ರಶ್ನಿಸುತ್ತಿದ್ದಾರೆ ಜನರು. ಎಸಿ ಕಚೇರಿ ಪ್ರವೇಶಿಸುವ ಗೇಟ್‌ ಬಳಿಯೇ ಕಾಂಪೌಂಡ್‌ ಮೇಲೆ ಎರಡು ಮನೆಗಳ ಟು-ಲೆಟ್‌ ಚೀಟಿ ಅಂಟಿಸಲಾಗಿದೆ. ಸಹಾಯಕ ಆಯುಕ್ತರ ಕಚೇರಿ ಬೋರ್ಡ್‌ ಪಕ್ಕದಲ್ಲಿಯೇ ಇವುಗಳಿರುವುದು ಕಚೇರಿಯ ಅಧಿಕಾರಿ, ಸಿಬ್ಬಂದಿ ನಿರ್ಲಕ್ಷ್ಯತೆಗೆ ಸಾಕ್ಷಿ ಎನ್ನುವಂತಿದೆ ಎನ್ನುತ್ತಾರೆ ಜನರು.
ಒಟ್ಟು ಮೂರು ಮನೆಗಳು ಬಾಡಿಗೆ ಇರುವ ಬಗ್ಗೆ ಮಾಹಿತಿ ಇರುವ ಮುದ್ರಿತ ಪ್ರತಿಗಳನ್ನು ಕಾಂಪೌಂಡ್‌ ಗೋಡೆಯ ಎಡಬದಿಯಲ್ಲಿ ಅಂಟಿಸಲಾಗಿದೆ. ಇದರಲ್ಲಿ 2 ಬಿಎಚ್‌ಕೆ ಮನೆ ಕೇವಲ ಸಸ್ಯಾಹಾರಿಗಳಿಗೆ ಮಾತ್ರ ಎನ್ನುವ ಬೋರ್ಡ್‌, ಕಳೆದ ಎರಡು ವಾರಗಳಿಂದ ಕಾಣಿಸುತ್ತಿದೆ. ಕಳೆದ ಕೆಲ ದಿನಗಳ ಹಿಂದಷ್ಟೇ ಅದರ ಕೆಳಗಡೆ ಮತ್ತೊಂದು ಮನೆಯ ಮಾಹಿತಿ ಇರುವ ಪ್ರತಿಯನ್ನು ಅಂಟಿಸಿದ್ದಾರೆ. ಮನೆ ಖಾಲಿ ಇರುವ ಬಗ್ಗೆ ಕಚೇರಿಗೆ ಬರುವ ಸಾರ್ವಜನಿಕರ ಗಮನ ಸೆಳೆಯುವ ಉದ್ದೇಶದಿಂದ ಈ ರೀತಿ ಅಂಟಿಸುತ್ತಾರೆ. ಆದರೆ, ಇದಕ್ಕೆ ಅವಕಾಶವಿದೆಯಾ? ಸರಕಾರಿ ಕಚೇರಿಗಳಲ್ಲಿ ಈ ರೀತಿ ಅಂಟಿಸಬಹುದಾ ಎನ್ನುವ ಪ್ರಶ್ನೆ ಕಾಡುತ್ತಿದೆ. ‘ಕಚೇರಿ ಕಾಂಪೌಂಡ್‌ಗೆ ಟು-ಲೆಟ್‌ ಬೋರ್ಡ್‌ ಹಾಕಿರುವುದು ಗಮನಕ್ಕೆ ಬಂದ ಕೂಡಲೇ ತೆಗೆಸಲಾಗಿದೆ. ಅಂಟಿಸಿದವರಿಗೆ ಈ ಕುರಿತು ಮತ್ತೊಮ್ಮೆ ಮರುಕಳಿಸಿದಲ್ಲಿ ಪ್ರಕರಣ ದಾಖಲಿಸಿ ಕ್ರಮ ಕೈಗೊಳ್ಳುವ ಬಗ್ಗೆ ಎಚ್ಚರಿಕೆ ನೀಡಲಾಗಿದೆ’ ಎಂದು ಹೊಸಪೇಟೆ ಸಹಾಯಕ ಆಯುಕ್ತ ವಿವೇಕಾನಂದ ಪ್ರತಿಕ್ರಿಯಿಸಿದ್ದಾರೆ.
