ಉಡುಪಿ: ಜಗತ್ತಿನ ರಾಷ್ಟ್ರಗಳಲ್ಲಿ ಮಾತ್ರವಲ್ಲ ಭಾರತದಲ್ಲೂ ಕಳೆದೊಂದು ದಶಕದಲ್ಲಿ ಡೆಂಗ್ಯೂ ಪ್ರಕರಣದ ಜತೆಗೆ ಸಾವಿನ ಪ್ರಕರಣಗಳು ಹೆಚ್ಚಿವೆ. 2014 ರಲ್ಲಿ 40,571 ಡೆಂಗ್ಯೂ ಪ್ರಕರಣ ಹಾಗೂ 137 ಸಾವಿನ ಪ್ರಕರಣ ದಾಖಲಾಗಿದ್ದರೆ, 2024 ರಲ್ಲಿ 2,33,400 ಪ್ರಕರಣದಲ್ಲಿ 235 ಮಂದಿ ಸಾವನ್ನಪ್ಪಿದ್ದಾರೆ. 2024 ರಲ್ಲಿ ಅತ್ಯಧಿಕ 2,89,235 ಪ್ರಕರಣ ಹಾಗೂ 485 ಸಾವು ಸಂಭವಿಸಿದೆ. ಮೇ16 ರಂದು ರಾಷ್ಟ್ರೀಯ ಡೆಂಗ್ಯೂ ತಡೆ ದಿನ. ತ್ವರಿತ ಕ್ರಮ ಡೆಂಗ್ಯೂ ತಡೆ, ಸ್ವಚ್ಛ ಪರಿಸರ ಆರೋಗ್ಯಕರ ಜೀವನ 2025 ನೇ ಸಾಲಿನ ಧ್ಯೇಯ ವಾಕ್ಯವಾಗಿದೆ.
j3tvkannada
ಡೆಂಗ್ಯೂ ಹರಡುವ ಸೊಳ್ಳೆ (ಈಡಿಸ್‌ ಈಜಿಪ್ಟಿ) ಬಿಳಿ ಕಪ್ಪು ಪಟ್ಟೆ ದೇಹ ಹೊಂದಿದ್ದು ಟೈಗರ್‌ ಮಾಸ್ಕಿಟೋ ಅಂತಲೂ ಕುಖ್ಯಾತಿ ಪಡೆದಿದೆ. ಬಹುತೇಕ ಸೊಳ್ಳೆಗಳು ರಾತ್ರಿ ಕಚ್ಚಿದರೆ ಡೆಂಗ್ಯೂ ಕಾರಕ ಸೊಳ್ಳೆ ಹಗಲು (ಬೆಳಗ್ಗೆ 6ರಿಂದ 10, ಸಂಜೆ 3ರಿಂದ 5 ಹೆಚ್ಚು ಸಕ್ರಿಯ) ಹಗಲು ಕಚ್ಚುತ್ತದೆ. ನಿಲ್ಲುವ ಶುದ್ಧ ನೀರಲ್ಲಿ ಮೊಟ್ಟೆಯಿಡುತ್ತವೆ. ನೀರಿನ ಬಕೆಟ್‌, ಟಾಂಕಿ, ಹಳೆಯ ಟಯರ್‌, ತೊಟ್ಟಿಗಳಲ್ಲಿ ಸಂತಾನೋತ್ಪತ್ತಿ ಮಾಡುತ್ತವೆ. ಈಡಿಸ್‌ ಈಜಿಪ್ಟಿ ಸೊಳ್ಳೆ ಡೆಂಗೆ ಜ್ವರ ಮಾತ್ರವಲ್ಲ ಚಿಕೂನ್‌ಗುನ್ಯಾ, ಜಿಕಾ ವೈರಸ್‌, ಎಲ್ಲೋ ಫೀವರ್‌ ತರಬಹುದು.
ಡೆಂಗ್ಯೂ ಹರಡದಂತೆ ಮುನ್ನಚರಿಕೆ ವಹಿಸಬೇಕಾದ ಕ್ರಮಗಳು:
*ಮನೆ ಸುತ್ತ ನೀರು ನಿಲ್ಲದಂತೆ ನೋಡಿಕೊಳ್ಳಿ.
*ನೀರಿನ ಪಾತ್ರೆ ಮುಚ್ಚಿಡಿ.
*ಮನೆಯಲ್ಲಿ ಫಾಗಿಂಗ್‌, ಸೊಳ್ಳೆ ನಿವಾರಣಾ ಧೂಪ ಬಳಸಿ.
*ಕೈ, ಕಾಲು ಮುಚ್ಚುವ ಬಟ್ಟೆ ಧರಿಸಿ.
*ಸೊಳ್ಳೆ ಕಚ್ಚದಂತೆ ಲೋಶನ್‌, ಕ್ರೀಮ್‌ ಬಳಸಿ.
ಮಳೆಗಾಲ ಬರುತ್ತಿದೆ, ಡೆಂಗುಕಾರಕ ಸೊಳ್ಳೆ ಉತ್ಪತ್ತಿಯಾಗದಂತೆ ಪ್ರತಿಯೊಬ್ಬರೂ ತಾವಿರುವ ಪರಿಸರದ ಸ್ವಚ್ಚತೆಗೆ ಗಮನ ಕೊಡಬೇಕು. ಜ್ವರದ ಲಕ್ಷಣ ಕಂಡುಬಂದರೆ ಪ್ರಾಥಮಿಕ ಆರೋಗ್ಯ ಕೇಂದ್ರ, ಕುಟುಂಬ ವೈದ್ಯರನ್ನು ಸಂಪರ್ಕಿಸಬೇಕು. ಡಾ.ಪ್ರಶಾಂತ್‌ ಭಟ್‌, ಮಲೇರಿಯಾ ನಿಯಂತ್ರಣ ಅಧಿಕಾರಿ, ಉಡುಪಿ ಜಿಲ್ಲಾಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ.
