ಮೈಸೂರು : ಮೈಸೂರಿನ ಕಟ್ಟಡ ಮತ್ತು ಇತರೆ ನಿರ್ಮಾಣ ಕಾರ್ಮಿಕರು ಹಾಗೂ ಅವರ ಅವಲಂಬಿತರ ಆರೋಗ್ಯ ರಕ್ಷಣೆಗೆ ಕಾರ್ಮಿಕ ಇಲಾಖೆಯು ಶೀಘ್ರದಲ್ಲಿಯೇ ಮೈಸೂರಿನಲ್ಲಿ 4 ಸಂಚಾರಿ ಹೈಟೆಕ್‌ ಆರೋಗ್ಯ ಕ್ಲಿನಿಕ್‌ ಆರಂಭಿಸಲಿದೆ. ಕಾರ್ಡ್‌ ಮಾಡಿಸಿಕೊಂಡಿರುವ ಜಿಲ್ಲೆಯ 1.43 ಲಕ್ಷ ಕಾರ್ಮಿಕರು ಹಾಗೂ ಅವರ ಕುಟುಂಬದವರು ಸೇರಿ ಒಟ್ಟು 6 ಲಕ್ಷ ಮಂದಿಗೆ ಆರೋಗ್ಯ ಸೇವೆ ದೊರೆಯುತ್ತದೆ. ರಾಜ್ಯ ಸರಕಾರ 2022-23ನೇ ಸಾಲಿನಲ್ಲಿ ರಾಜ್ಯದ 31 ಜಿಲ್ಲೆಗಳಿಗೆ 100 ಸಂಚಾರಿ ಆರೋಗ್ಯ ಕ್ಲಿನಿಕ್‌ಗಳನ್ನು ಆರಂಭಿಸುವುದಾಗಿ ಘೋಷಣೆ ಮಾಡಿತ್ತು. ಈ ಯೋಜನೆ ಅನುಷ್ಠಾನಗೊಳಿಸಲು ಇದೀಗ ಭರದ ಸಿದ್ಧತೆ ನಡೆದಿದ್ದು, ಮೈಸೂರಿನಲ್ಲಿ ಒಂದು ವಾರದಲ್ಲಿ 4 ಸಂಚಾರಿ ಹೈಟೆಕ್‌ ಕ್ಲಿನಿಕ್‌ಗಳ ಕಾರ್ಯ ಆರಂಭಿಸಲಿವೆ ಎಂದು ಕಾರ್ಮಿಕ ಅಧಿಕಾರಿ ಚೇತನ್‌ ತಿಳಿಸಿದರು. ಮೈಸೂರು ನಗರ ಹಾಗೂ ತಾಲೂಕು ವ್ಯಾಪ್ತಿಗೆ 2, ತಿ.ನರಸೀಪುರ- ನಂಜನಗೂಡು- ಎಚ್‌.ಡಿ.ಕೋಟೆಗೆ 1, ಕೃಷ್ಣರಾಜನಗರ- ಹುಣಸೂರು- ಪಿರಿಯಾ ಪಟ್ಟಣ 1 ಸಂಚಾರಿ ಆರೋಗ್ಯ ಕ್ಲಿನಿಕ್‌ ವಾಹನಗಳು ಕಟ್ಟಡ ಕಾರ್ಮಿಕರಿಗೆ ಆರೋಗ್ಯ ಸೇವೆ ನೀಡಲಿವೆ. ಕಾರ್ಮಿಕ ಇಲಾಖೆಯಡಿ ಬರುವ ಕರ್ನಾಟಕ ಕಟ್ಟಡ ಮತ್ತು ಇತರೆ ನಿರ್ಮಾಣ ಕಾರ್ಮಿಕರ ಕಲ್ಯಾಣ ಮಂಡಳಿಯಲ್ಲಿ ನೋಂದಣಿಯಾಗಿರುವ ಕಾರ್ಮಿಕರು ಈ ಸೇವೆ ಪಡೆಯ ಬಹುದಾಗಿದೆ.
ಪ್ರತಿ ಸಂಚಾರಿ ಕ್ಲಿನಿಕ್‌ಗಳಲ್ಲಿಯೂ ಒಬ್ಬರು ವೈದ್ಯಕೀಯ ಅಧಿಕಾರಿ, ಇಬ್ಬರು ನರ್ಸ್‌, 1 ಫಾರ್ಮಸಿಸ್ಟ್‌ ಕಮ್‌ ಅಡ್ಮಿನಿಸ್ಪ್ರೇಟಿವ್‌ ಅಸಿಸ್ಟೆಂಟ್‌, 1 ಪ್ರಯೋಗಾಲಯ ತಜ್ಞರು, ಒಬ್ಬರು ಚಾಲಕರು ಕಾರ್ಯನಿರ್ವಹಿಸುವರು. ಈ ಸುಸಜ್ಜಿತ ತಂಡ ಬೆಳಗ್ಗೆಯಿಂದ ಮಧ್ಯಾಹ್ನದವರೆಗೆ ಒಂದು ಕಡೆ, ಮಧ್ಯಾಹ್ನದ ನಂತರ ಮತ್ತೊಂದು ವಾರ್ಡ್‌, ಗ್ರಾಮಗಳ ಬಸ್‌ ನಿಲ್ದಾಣದ ಬಳಿ ಕನಿಷ್ಠ 4 ಗಂಟೆ ಕಾರ್ಯನಿರ್ವಹಿಸಲಿವೆ. ಈ ಕ್ಲಿನಿಕ್‌ ಅನ್ನು ಯಾವಾಗ ಎಲ್ಲೆಲ್ಲಿ ನಡೆಸಲಾಗುತ್ತದೆ ಎಂಬ ಒಂದು ತಿಂಗಳ ರೂಟ್‌ ಮ್ಯಾಪನ್ನು 15 ದಿನ ಮುಂಚಿತವಾಗಿಯೇ ಸಿದ್ಧಪಡಿಸಿ ಸಂಬಂಧಿಸಿದ ವಾರ್ಡ್‌, ತಾಪಂ, ಗ್ರಾಪಂ, ಹೋಬಳಿ, ಕಾರ್ಮಿಕ ಸಂಘಟನೆಗಳಿಗೆ ರವಾನಿಸಲಾಗುತ್ತದೆ. ಮಂಡಳಿಯಿಂದ ಪಡೆದಿರುವ ಕಾರ್ಡ್‌ ತೋರಿಸಿ ಸೇವೆ ಪಡೆಯಬಹುದು. ಈ ಕ್ಲಿನಿಕ್‌ನಲ್ಲಿ ಹೊರ ರೋಗಿಗಳಾಗಿ(ಒಪಿಡಿ) ಪಡೆಯುವ ಎಲ್ಲಾ ಚಿಕಿತ್ಸೆಗಳ ಸೇವೆ ನೀಡಲಾಗುತ್ತದೆ. ಅಧಿಕ ರಕ್ತದೊತ್ತಡ, ಸಕ್ಕರೆ ಕಾಯಿಲೆ ಸೇರಿದಂತೆ ನಾನಾ ಕಾಯಿಲೆಗಳನ್ನು ಪರೀಕ್ಷಿಸಿ ಔಷಧ ವಿತರಿಸಲಾಗುವುದು. 20ಕ್ಕೂ ಹೆಚ್ಚು ಪರೀಕ್ಷೆಗಳನ್ನು ಸ್ಥಳದಲ್ಲಿಯೇ ಮಾಡಲಾಗುತ್ತದೆ. ಸಂಚಾರಿ ಘಟಕದಲ್ಲಿ 25 ಮಾದರಿಯ ಪರೀಕ್ಷೆ ಮಾಡಬಹುದಾದ ವೈದ್ಯಕೀಯ ಉಪಕರಣ, ಬಯೋಕೆಮಿಸ್ಟ್ರಿ ಅನಲೈಸರ್‌, ಇಎಸ್‌ಆರ್‌, ಯೂರಿನ್‌ ಅನಧಿಲೈಸರ್‌, ಎಚ್‌ಬಿ ಮೀಟರ್‌ ಸೇರಿದಂತೆ ಒಟ್ಟು 5 ಪ್ರಯೋಗಾಲಯ ಉಪಕರಣಗಳು, ಚಿಕಿತ್ಸೆಗೆ ಪೂರಕವಾದ 37 ನಾನಾ ವೈದ್ಯಕೀಯ ಬಳಕೆ ವಸ್ತುಗಳು ವಾಹನದಲ್ಲಿರುತ್ತವೆ.
