ಬೆಂಗಳೂರು: ನಟಿ ಸಂಜನಾ ಗಲ್ರಾನಿ ಅಲಿಯಾಸ್‌ ಅರ್ಚನಾ ಗಲ್ರಾನಿ ಹಣ ಪಡೆದು ವಂಚಿಸಿದ ಆರೋಪದ ಮೇರೆಗೆ ಉದ್ಯಮಿ ರಾಹುಲ್‌ ತೋನ್ಸೆ (36) ಅಪರಾಧಿ ಎಂದು ಘೋಷಿಸಿರುವ ನಗರದ 3 ನೇ ಹೆಚ್ಚುವರಿ ಮ್ಯಾಜಿಸ್ಪ್ರೇಟ್‌ ನ್ಯಾಯಾಲಯ, 61.4 ಲಕ್ಷ ರೂ. ಹಿಂದಿರುಗಿಸುವಂತೆ ಆದೇಶ ಹೊರಡಿಸಿದೆ.
” ದೂರುದಾರೆ ಸಂಜನಾಗೆ 61.4 ಲಕ್ಷ ರೂ. ಹಿಂದಿರುಗಿಸಲು ವಿಫಲವಾದರೆ ಅಪರಾಧಿ ರಾಹುಲ್‌ ತೋನ್ಸೆ ಆರು ತಿಂಗಳ ಸಾದಾ ಜೈಲು ಶಿಕ್ಷೆ ಪೂರೈಸಬೇಕು. ಒಂದು ವೇಳೆ ಪರಿಹಾರ ಮೊತ್ತ ನೀಡದೆ ಜೈಲು ಶಿಕ್ಷೆ ಅನುಭವಿಸಿದರೂ ದೂರುದಾರೆಗೆ ಪರಿಹಾರ ಹಿಂದಿರುಗಿಸುವ ಹೊಣೆಯಿಂದ ತಪ್ಪಿಸಿಕೊಳ್ಳಲು ಸಾಧ್ಯವಿಲ್ಲ ” ಎಂದು ಬೆಂಗಳೂರು ನ್ಯಾಯಾಲಯ ಆದೇಶದಲ್ಲಿ ತಿಳಿಸಿದೆ.
2018 ಹಾಗೂ 2019 ರ ಅವಧಿಯಲ್ಲಿ ರಿಯಲ್‌ ಎಸ್ಟೇಟ್‌ ಹೂಡಿಕೆ ನೆಪದಲ್ಲಿ45 ಲಕ್ಷ ರೂ. ಪಡೆದಿದ್ದ ಸ್ನೇಹಿತ ರಾಹುಲ್‌ ತೋನ್ಸೆ, ಹಣ ವಾಪಸ್‌ ಕೊಡದೆ ವಂಚಿಸಿದ್ದಾನೆ ಎಂದು ಆರೋಪಿಸಿ 2021 ರಲ್ಲಿಇಂದಿರಾ ನಗರದಲ್ಲಿ ಪ್ರಕರಣ ದಾಖಲಿಸಿದ್ದರು. ಅಷ್ಟೇ ಅಲ್ಲದೆ, ಕೋರ್ಟ್‌ ಸೂಚನೆ ಮೇರೆಗೆ ಸಂಜನಾ, ರಾಹುಲ್‌ ತೋನ್ಸೆ ವಿರುದ್ಧ ನ್ಯಾಯಾಲಯದಲ್ಲಿ ವಂಚನೆ ಹಾಗೂ ಚೆಕ್‌ಬೌನ್ಸ್‌ ಪ್ರಕರಣವನ್ನೂ ದಾಖಲಿಸಿದ್ದರು.
ಈ ಪ್ರಕರಣದ ವಿಚಾರಣೆ ಪೂರ್ಣಗೊಳಿಸಿರುವ ನ್ಯಾಯಾಲಯ, ಚೆಕ್‌ ಬೌನ್ಸ್‌ ಪ್ರಕರಣದಲ್ಲಿ ರಾಹುಲ್‌ ತೋನ್ಸೆ ಅಪರಾಧಿ ಎಂದು ಘೋಷಿಸಿ ದೂರುದಾರೆ ನಟಿ ಸಂಜನಾ ಅವರಿಗೆ ಹಣಕ್ಕೆ ಬಡ್ಡಿ ಸಹಿತ 61.40 ಲಕ್ಷ ರೂ. ವಾಪಸ್‌ ನೀಡುವಂತೆ ಆದೇಶಿಸಿದೆ.
ಯಾರೀ ರಾಹುಲ್‌ ತೋನ್ಸೆ
ಐದು ವರ್ಷಗಳ ಹಿಂದೆ ಸ್ಯಾಂಡಲ್‌ ವುಡ್‌ ಡ್ರಗ್ಸ್‌ ದಂಧೆ ಪ್ರಕರಣದಲ್ಲಿ ಸಿ ಸಿ ಬಿ ಪೊಲೀಸರಿಂದ ರಾಹುಲ್‌ ತೋನ್ಸೆ ಬಂಧನವಾಗಿದ್ದ. ಶ್ರೀಲಂಕಾದಲ್ಲಿ ಕ್ಯಾಸಿನೋ ಹಾಗೂ ಬಿಟ್‌ ಕಾಯಿನ್‌ ಉದ್ಯಮ ಹೂಡಿಕೆ ನೆಪದಲ್ಲಿ ನಗರದ ಉದ್ಯಮಿಯೊಬ್ಬರ ಬಳಿ 25 ಕೋಟಿ ರೂ. ಪಡೆದು ವಂಚಿಸಿದ ಆರೋಪ ಸಂಬಂಧ ಇದೇ ಫೆಬ್ರವರಿಯಲ್ಲಿ ರಾಹುಲ್‌ ತೋನ್ಸೆ, ಸಹೋದರಿ ರೇಖಾ ತೋನ್ಸೆ ಸೇರಿ ಐವರು ಕುಟುಂಬ ಸದಸ್ಯರ ವಿರುದ್ಧ ಬಸವೇಶ್ವರನಗರ ಠಾಣೆ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಪ್ರಕರಣ ಸಂಬಂಧ ರಾಹುಲ್‌ ತಂದೆಯನ್ನು ಪೊಲೀಸರು ಬಂಧಿಸಿದ್ದರು. ಪ್ರಮುಖ ಆರೋಪಿ ರಾಹುಲ್‌ ವಿದೇಶದಲ್ಲಿ ತಲೆ ಮರೆಸಿಕೊಂಡಿದ್ದು, ಬಂಧನಕ್ಕೆ ಪೊಲೀಸರು ಲುಕ್‌ ಔಟ್‌ ನೋಟಿಸ್‌ ಜಾರಿಗೊಳಿಸಿದ್ದಾರೆ.
