ಚಾಮರಾಜನಗರ:ಇದು ವೇಗದ ಯುಗ, ಅದಕ್ಕೆ ತಕ್ಕಂತೆ ಜನತೆ ಸಹ ತಮ್ಮ ಓಡಾಟ, ಪ್ರಯಾಣಕ್ಕೆ ಸಾರ್ವಜನಿಕ ವಲಯದ ವಾಹನಗಳ ಮೇಲಿನ ಅವಲಂಬನೆಗಿಂತ ವೈಯಕ್ತಿಕವಾಗಿ ವಾಹನಗಳ ಖರೀದಿಗೆ ಮುಂದಾಗಿದ್ದು, ಜಿಲ್ಲೆಯಲ್ಲೂ ಖರೀದಿ ಭರಾಟೆ ಹೆಚ್ಚಾಗಿದೆ.
j3tvkannada.in
ಸ್ಪರ್ಧಾತ್ಮಕ ಪ್ರಪಂಚದ ವೇಗಕ್ಕೆ ತಕ್ಕಂತೆ ವಾಹನಗಳ ಖರೀದಿಯಲ್ಲಿ ಹಿಂದುಳಿದ ಜಿಲ್ಲೆಯ ಜನ ಮಾತ್ರ ಹಿಂದೆ ಬಿದ್ದಿಲ್ಲ. ಅದರಲ್ಲೂ ಚಾಮರಾಜನಗರದಲ್ಲಿ ಪ್ರಾದೇಶಿಕ ಸಾರಿಗೆ ಪ್ರಾಧಿಕಾರದ ನೋಂದಣಿ ಸಂಖ್ಯೆ ಸಹ ಹೆಚ್ಚಾಗುತ್ತಿದೆ. ಕೆಎ 10 ನೋಂದಣಿ ಸಂಖ್ಯೆಯಲ್ಲಿ ಕಾರುಗಳ ಪ್ರಮಾಣ ಕಡಿಮೆ ಇದ್ದರೂ, ಬೈಕ್‌ಗಳ ಸಂಖ್ಯೆ ಸಾಕಷ್ಟು ಏರಿಕೆಯಾಗಿದೆ. ಕಳೆದ ನಾಲ್ಕು ವರ್ಷಗಳಿಗೆ ಹೋಲಿಸಿದರೆ ವರ್ಷದಿಂದ ವರ್ಷಕ್ಕೆ ಕಾರು, ಬೈಕ್‌ ಖರೀದಿ ಏರಿಕೆ ಆಗುತ್ತಲೇ ಇದೆ.
ಮನೆಗೊಂದಲ್ಲ, ಎರಡು ವಾಹನ ಎಂಬಂತೆ ಪೈಪೋಟಿಗೆ ಬಿದ್ದು, ದ್ವಿಚಕ್ರ ವಾಹನಗಳ ಖರೀದಿ ನಡೆಯುತ್ತಿದೆ. ಸಾರ್ವಜನಿಕ ಸೇವೆಗಾಗಿಯೇ ಇರುವ ಬಸ್‌, ರೈಲು ಓಡಾಟ ಹೆಚ್ಚಾಗಿದ್ದರೂ ವೈಯಕ್ತಿಕ ವಾಹನಗಳ ಸಂಖ್ಯೆ ಹೆಚ್ಚಿರುವುದು ವೇಗ, ಸ್ಪರ್ಧಾತ್ಮಕ ಯುಗದ ಬೆಳವಣಿಗೆಗೆ ಸಾಕ್ಷಿಯಾಗಿದೆ. ವಾಹನಗಳ ಸಂಖ್ಯೆ ಹೆಚ್ಚಾದಷ್ಟು ಅಪಘಾತಗಳ ಸಂಖ್ಯೆ ಸಹ ಹೆಚ್ಚಾಗುತ್ತಿದೆ. ವಾಹನಗಳ ಸಂಖ್ಯೆ, ವೇಗಕ್ಕೆ ತಕ್ಕಂತೆ ರಸ್ತೆ ವ್ಯವಸ್ಥೆ ಇಲ್ಲದಿರುವುದು ಒಂದೆಡೆಯಾದರೆ, ಸಂಚಾರ ನಿಯಮ ಪಾಲನೆ ಉಲ್ಲಂಘನೆ, ಜಾಗೃತಿ ಕೊರತೆ ಸಹ ಅಪಘಾತಗಳಿಗೆ ಕಾರಣವಾಗುತ್ತಿದೆ. ಮತ್ತೊಂದು ಐಶಾರಾಮಿ ವಾಹನಗಳೆಡೆಗಿನ ಆಕರ್ಷಣೆ ಸಹ ವಾಹನಗಳ ಖರೀದಿ ಭರಾಟೆ ಹೆಚ್ಚು ಮಾಡಿದ್ದು, ಅದೇ ಆಕರ್ಷಣೆ ಅಪಘಾತಕ್ಕೂ ಕಾರಣವಾಗುತ್ತಿರಬಹುದು ಎನ್ನಲಾಗುತ್ತಿದೆ. ವಾಹನಗಳಿಗೆ ತಕ್ಕಂತೆ ಚಾಲನೆ, ಸಂಯಮ, ಸಂಚಾರದ ರೂಲ್ಸ್ ಪಾಲನೆಯೆಡೆಗೂ ಗಮನ ಇರಬೇಕು ಎಂಬುದು ಸಾರಿಗೆ ಅಧಿಕಾರಿಗಳ ಸಲಹೆ.
ಜಿಲ್ಲೆಯ ರಸ್ತೆಗಳಲ್ಲೂ ಬೆನ್ಜ್, ಬಿಎಂಡಬ್ಲ್ಯು, ರೇಂಜ್‌ ರೋವರ್‌, ಫಚ್ರ್ಯೂನರ್‌ನಂತಹ ದುಬಾರಿ ಬೆಲೆಯ ಕಾರುಗಳು ಓಡಾಡುತ್ತಿವೆ. ಅಲ್ಲದೇ ಕೆಎ 10 ಸಂಖ್ಯೆಯಲ್ಲೂ ಐಶಾರಾಮಿ ಕಾರುಗಳು ನೋಂದಣಿ ಆಗುತ್ತಿರುವುದರಂದ ಜಿಲ್ಲೆ ಸಹ ಆರ್ಥಿಕವಾಗಿ ಮುನ್ನುಗುತ್ತಿದೆ ಎಂಬ ಕುರುಹು ನೀಡಿದೆ.
ಚಾಮರಾಜನಗರ ಜಿಲ್ಲೆಯ ಪ್ರಾದೇಶಿಕ ಸಾರಿಗೆ ಕಚೇರಿಯ ಕೆಎ 10 ಸಂಖ್ಯೆಯಲ್ಲಿ 2020-21ನೇ ಸಾಲಿನಲ್ಲಿ 593 ಕಾರುಗಳು, 11,132 ದ್ವಿಚಕ್ರ ವಾಹನಗಳು ನೋಂದಣಿಯಾಗಿವೆ. ಅದೇ ರೀತಿಯಲ್ಲಿ 2021-22ರಲ್ಲಿ 532 ಕಾರುಗಳು, 8,185 ದ್ವಿಚಕ್ರ ವಾಹನಗಳು, 2022-23 ರಲ್ಲಿ637 ಕಾರುಗಳು, 9,746 ದ್ವಿಚಕ್ರ ವಾಹನಗಳು, 2023-24ರಲ್ಲಿ 688 ಕಾರುಗಳು, 13,165 ದ್ವಿಚಕ್ರ ವಾಹನಗಳು, 2024-25ರಲ್ಲಿ700 ಕಾರುಗಳು, 13,706 ದ್ವಿಚಕ್ರ ವಾಹನಗಳು ನೋಂದಣಿಯಾಗಿವೆ. ಆ ಬಳಿಕ ಇದೇ ವರ್ಷ ಏಪ್ರಿಲ್‌ ತಿಂಗಳಲ್ಲಿ 57 ಕಾರುಗಳು, 1163 ದ್ವಿಚಕ್ರ ವಾಹನಗಳು, ಮೇ ತಿಂಗಳಲ್ಲಿ60 ಕಾರುಗಳು, 1003 ದ್ವಿಚಕ್ರ ವಾಹನಗಳು ನೋಂದಣಿಯಾಗಿವೆ ಎಂದು ಪ್ರಾದೇಶಿಕ ಸಾರಿಗೆ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ. ಕಾರುಗಳಿಗಿಂತ ಬೈಕ್‌ಗಳ ಖರೀದಿ, ನೋಂದಣಿ ಜಿಲ್ಲೆಯಲ್ಲಿ ಹೆಚ್ಚಾಗಿದೆ ಎಂದಿದ್ದಾರೆ ಗಾಯತ್ರಿ, ಪ್ರಾದೇಶಿಕ ಸಾರಿಗೆ ಅಧಿಕಾರಿ.
