ಆಲಮಟ್ಟಿ (ವಿಜಯಪುರ): ಆಲಮಟ್ಟಿ ಡ್ಯಾಂಗೆ ಈ ಬಾರಿ ಅವಧಿಗೂ ಮುನ್ನವೇ ಒಳಹರಿವು ಆರಂಭವಾಗಿದ್ದು, ಗುರುವಾರ ಸಂಜೆಯಿಂದ ವಿದ್ಯುತ್‌ ಉತ್ಪಾದನೆ ಮೂಲಕ ನದಿ ಪಾತ್ರಕ್ಕೆ ನೀರು ಹರಿಸಲಾಗುತ್ತಿದೆ. ಪ್ರಸಕ್ತ ಸಾಲಿನಲ್ಲಿ ವಿಜಯಪುರ ಮತ್ತು ಬಾಗಲಕೋಟೆ ಜಿಲ್ಲೆಗಳಲ್ಲಿ ಸುರಿದ ಮಳೆಯಿಂದಾಗಿ ಆಲಮಟ್ಟಿಯ ಲಾಲ್‌ ಬಹದ್ದೂರ್‌ ಶಾಸ್ತ್ರಿ ಸಾಗರಕ್ಕೆ ಮೇ 19 ರಿಂದ ಒಳಹರಿವು ಆರಂಭವಾಗಿತ್ತು. ನಾಲ್ಕೈದು ದಿನಗಳ ನಂತರ ಮಹಾರಾಷ್ಟ್ರದ ಕೃಷ್ಣಾ ಅಚ್ಚುಕಟ್ಟು ಪ್ರದೇಶಲ್ಲಿ ಸುರಿದ ಮಳೆಯಿಂದ ಡ್ಯಾಂನ ಒಳಹರಿವು ಹೆಚ್ಚುತ್ತಾ ಸಾಗಿದೆ.
j3tvkannada
ಒಳಹರಿವಿನ ಪ್ರಮಾಣ ಹೆಚ್ಚಾಗಿದ್ದರಿಂದ ಸಂಗ್ರಹ ಕೂಡ ಏರತೊಡಗಿದೆ. ಗರಿಷ್ಠ 519.60 ಮೀಟರ್‌ ಎತ್ತರದಲ್ಲಿ 123.081 ಟಿ.ಎಂ.ಸಿ ನೀರು ಸಂಗ್ರಹ ಸಾಮರ್ಥ್ಯದ ಆಲಮಟ್ಟಿ ಡ್ಯಾಂನಲ್ಲಿ ಗುರುವಾರ ಬೆಳಗ್ಗೆ 512.78 ಮೀಟರ್‌ ಎತ್ತರದಲ್ಲಿ 45.957 ಟಿಎಂಸಿ ನೀರು ಸಂಗ್ರಹವಾಗಿತ್ತು. ಒಳಹರಿವು 60,379 ಕ್ಯುಸೆಕ್‌ ಇತ್ತು. 2024 ಮೇ 29 ರಂದು 508.06 ಮೀಟರ್‌ ಎತ್ತರದಲ್ಲಿ 21.634 ಟಿ.ಎಂ.ಸಿ ನೀರು ಸಂಗ್ರಹವಿತ್ತು. ಕಳೆದ ವರ್ಷಕ್ಕಿಂತ ಈ ಬಾರಿ 24.323 ಟಿ.ಎಂ.ಸಿ ನೀರು ಹೆಚ್ಚುವರಿ ಇದೆ.
j3tvkannada
ಮೇ 19 ರಂದು ಡ್ಯಾಂನಲ್ಲಿ 23.756 ಟಿ.ಎಂ.ಸಿ ನೀರು ಸಂಗ್ರಹವಿತ್ತು. ಅಂದಿನಿಂದ ಡ್ಯಾಂಗೆ ಒಳಹರಿವು ಆರಂಭವಾಗಿದ್ದು 10 ದಿನಗಳಲ್ಲಿ 22.201 ಟಿ.ಎಂ.ಸಿ ನೀರು ಹರಿದು ಬಂದಿದೆ. ಒಟ್ಟು 45.957 ಟಿ.ಎಂ.ಸಿ ನೀರು ಸಂಗ್ರಹವಾಗಿದೆ. ಗುರುವಾರ ಸಂಜೆ 10 ಕ್ಯೂಸೆಕ್‌ ನೀರನ್ನು ವಿದ್ಯುದಾಗಾರದ ಮೂಲಕ ಹರಿಸಲಾಗಿದೆ. ಇದರಿಂದ 55 ಮೆಗಾವ್ಯಾಟ್‌ ವಿದ್ಯುತ್‌ ಉತ್ಪಾದನೆ ಸಾಮರ್ಥ್ಯದ ಒಂದು ಘಟಕ ಕಾರ್ಯಾರಂಭ ಮಾಡಿದೆ. ಆಲಮಟ್ಟಿ ಜಲಾಶಯದ ನೀರಿನ ಮಟ್ಟ ಹಾಗೂ ಜಲಾಶಯದ ನೀರನ್ನು ನದಿ ಪಾತ್ರಕ್ಕೆ ಹರಿ ಬಿಡುವ ಪ್ರಮಾಣದ ಮೇಲೆ ಇಲ್ಲಿ ವಿದ್ಯುತ್‌ ಉತ್ಪಾದನೆ ಮಾಡಲಾಗುತ್ತದೆ.
ಆಲಮಟ್ಟಿ ಜಲ ವಿದ್ಯುದಾಗಾರದಲ್ಲಿ 2004-05ರಿಂದ ವಿದ್ಯುತ್‌ ಉತ್ಪಾದನೆ ಪ್ರಾರಂಭಗೊಂಡಿದೆ. ವಿದ್ಯುದಾಗಾರದಲ್ಲಿ 55 ಮೆಗಾವ್ಯಾಟ್‌ ಸಾಮರ್ಥ್ಯದ 5 ಘಟಕ, 15 ಮೆಗಾವ್ಯಾಟ್‌ ಸಾಮರ್ಥ್ಯದ ಒಂದು ಘಟಕ ಸೇರಿ ಒಟ್ಟು 6 ಘಟಕಗಳಿವೆ. 290 ಮೆಗಾವ್ಯಾಟ್‌ ವಿದ್ಯುತ್‌ ಉತ್ಪಾದನೆ ಸಾಮರ್ಥ್ಯ ಹೊಂದಿದೆ. ವಿದ್ಯುತ್‌ ಘಟಕದ ಎಲ್ಲ 6 ಘಟಕಗಳು ಕಾರ್ಯಾರಂಭ ಮಾಡಲು ಜಲಾಶಯದಿಂದ 45 ಸಾವಿರ ಕ್ಯೂಸೆಕ್‌ ನೀರು ಹರಿಸಬೇಕಾಗುತ್ತದೆ. ನಿತ್ಯ ಎಲ್ಲ ಘಟಕಗಳು ಕಾರ್ಯಾರಂಭ ಮಾಡಿದರೆ 6 ದಶಲಕ್ಷ ವರೆಗೆ ವಿದ್ಯುತ್‌ ಉತ್ಪಾದನೆ ನಿತ್ಯ ನಡೆಯುತ್ತದೆ.
ಆಲಮಟ್ಟಿಯ ಜಲ ವಿದ್ಯುದಾಗಾರದಲ್ಲಿ ಉತ್ಪಾದನೆಯಾಗುವ ವಿದ್ಯುತ್‌ನ್ನು 220 ಕೆವಿಯ ಬಾಗಲಕೋಟೆ-1, ಬಾಗಲಕೋಟೆ-2, ಬಸವನಬಾಗೇವಾಡಿ-1 ಮತ್ತು ಬಸವನಬಾಗೇವಾಡಿ-2 ಲೈನ್‌ಗಳಿಗೆ ನೀಡಲಾಗುತ್ತದೆ. ಅಲ್ಲಿಂದ ಬೇರೆ ಬೇರೆ ನಗರಗಳಿಗೆ ವಿದ್ಯುತ್‌ ಪ್ರಸರಣವಾಗುತ್ತದೆ. 2025-26ನೇ ಸಾಲಿಗೆ 510 ದಶಲಕ್ಷ ಯೂನಿಟ್‌ ವಿದ್ಯುತ್‌ ಉತ್ಪಾದನೆ ಗುರಿ ನೀಡಲಾಗಿದೆ. ಏ.1ರಿಂದ ಮೇ 28ರವರೆಗೆ 0.34 ದಶಲಕ್ಷ ಯೂನಿಟ್‌ ವಿದ್ಯುತ್‌ ಉತ್ಪಾದಿಸಲಾಗಿದೆ ಎಂದಿದ್ದಾರೆ.
